Tahiti Infos

TAHITI INFOS, les informations de Tahiti
Facebook
Twitter
RSS
I phone App
Androïd
Newsletter
FENUACOMMUNICATION - immeuble Tutuapare - Shell RDO Faa'a - BP 40160 98 713 Papeete Polynésie française. Tel: 40 43 49 49



PĀPĀ ' Ū



I roto i teie 'utuāfare nō Afa'ahiti, e ahimā'a te 'ōro'a o tei fa'atupu i te mahana mātāmua nō te
mau matahiti 'āpī ato'a. Nā te metua rū'au, 'o pāpā Siki, tei fa'anaho i te 'ohipa i roto i te 'ōpū fēti'i.
 
Mai Hiva-Oa mai te i'a, te pua'a 'e te pua'aniho. Nā te itoito e ha'a-roa'a mai i teie 'īna'i. E
haere e hī 'aore rā e pupuhi i te i'a. E ta'ata a'ua'u pua'a 'ōviri 'o Kau. E ta'ata a'ua'u pua'aniho 'o
Tefa. E mo'otua 'o Kau rāua 'o Tefa a teie pāpā 'ū. E fa'aea rāua to'opiti i roto i te peho 'o Puama'u.
'Eiaha e 'aramōina ato'a i te pīere nō te hāmani i te po'e 'e te tāporo nō te i'a ota. E huri i terā mā'a i
ni'a ia 'Aranui, e pahī tei tere nei i te pae Matuita mā.
 
Mai roto mai te mau peho nō Tahiti iti, te mā'a tupu 'e te mā'a hotu o tā rātou e fāna'o nō te
mā'a tahiti. E roa'a te fāfā 'e te taro i Tautira 'āre'a te fē'i 'e te 'ūmara i To'ahotu .a. Te 'ōpa'a, te 'uru 'e
te mei'a i te fare noa i Afa'ahiti. Mai te nī'au nō te hāmani i te 'ō'īni, te rau'uru nō te 'āpapa atu i roto
'e te raumāi'a nō te tāpo'i i te mā'a.
 
'Ia naho maita'i i terā mau 'ohipa, e fa'aineine .a i te umu. 'Ua ta'ita'ihia mai te tumu mei'a
mai uta mai, 'ua 'ohihia te 'ōfa'i i te muriāvai 'e 'ua ha'aputuhia te vahie, te 'apu ha'ari 'e te pūtē pūhā.
E taime fatara'a i te ahimā'a.
 
E 'āmui te 'ōpū fēti'i 'ia oti vave te 'ohipa i te 'utuāfare nō Afa'ahiti nei. I roto i te 'āua, e
fa'aro'o te fa'a'oira'a i te tipi rahi, te tāpūpūra'a o te pua'aniho 'e te pua'a, te unahira'a o te i'a, te
'āpa'ira'a 'e te 'anara'a o te 'ōpa'a, te tipitiptira'a o te taro 'e te 'uru 'e te vai atu rā. I ni'a i te tahua 'o te
fare, e ha'une i te rau'ere nī'au e te mau vahine o tei pārahi i ni'a i te pē'ue, hou 'a 'āpapa ai i te mā'a i
roto i te 'ō'īni. I roto i te fare tūtu, e pāina i te rau mei'a e te mau pōti'i hou 'a pū'ohu ai i te po'e
pīere. E fa'ati'a parau te vahine ma te 'ata pa'a noa, e hīmenemene noa ai te taure'are'a, e tūtuō te
tamari'i ma te ha'uti perē fē 'e e ta'i pūai roa te 'āfata rātio i rāpae'au mai i te fare.
 
'Ua pō ! 'Ia ahu te ahimā'a, e pī'ehi i te ahimā'a. 'Ia oti i te pī'ehi, e rauai. E fa'anahora'a teie a
te mau tāne o tei fāna'o i te ha'api'ira'a a pāpā Siki. 'Ua tae te taime 'āpapara'a mā'a ! 'Ia oti te mā'a i
te 'āpapa, e ha'apo'i i te ahimā'a i te rau'a'ai.
 
'Ua ao ! 'Ia naho te fare, e fa'a'una'unara'a pou te 'ohipa e rave a te mau vahine. E 'auti, e 'ōpuhi, e
anuhe, e ti'ati'a mou'a … te fa'a'una'una. 'Ia oti, e tui hei tō muri.
 
I Afa'ahiti, i te mahana mātāmua nō te mau matahiti 'āpī ato'a, 'ua riro teie fare 'ei vāhi
'āmuira'a a te 'ōpū fēti'i a pāpā Siki. 'Ua ti'a maira teie metua rū'au nō te fāri'i i te manihini 'e nō te
ha'amāuruuru i te rima tauturu pāpū 'e te Fatu.
'A hūa'i i te ahimā'a !
 
 
Koko TAMA NŌ PUTI’O
le Lundi 4 Novembre 2019 à 15:47 | Lu 1876 fois




Dans la même rubrique :
< >

Vendredi 15 Novembre 2019 - 16:59 Sur l'île de Clampin

Jeudi 14 Novembre 2019 - 16:59 J’ai rêvé d’une île

Actualité de Tahiti et ses îles | Actualité de France | Actualité du Pacifique | Actualité du Monde | Actualité du Sport | Insolite | Magazine | Assistance | Appels d'offre et communiqués | Concours d'écriture - Salon du Livre 2019 | Concours d'écriture - Salon du Livre 2020 | Coronavirus