Tahiti Infos

Te mau Fa’aotira’a a te ‘Āpo’ora’a a te mau Fa’aterehau, mahana toru 26 no ’Atopa 2016  26/10/2016


Tauturu moni na te OPT no te fa’atorora’a i te niuniu na raro i te moana na Tuamotu ma e na Matuita ma


Te fa no te tauturu moni a Porinetia farani na te EPIC OPT (Piha no te mau Fareata e o te mau Taniuniura’a parauparau), na roto i te ‘Afata Ta’a-è no te Fa’ahotura’a 2016, o te tu’atira’a ia Tahiti i ni’a i vetahi no te mau motu no te mau Ta’amotu no Tuamotu ma e no Matuita ma, na roto i te ho’e fa’anahora’a taniuniura’a faito teitei na roto i te mau niuniu na raro i te moana e te mau pupa reni hereteti.

Te mutura’a rorouira i rotopu ia Tahiti e te mau motu o tei ‘ore i natihia i ni’a i te niuniu na raro i te moana o Honotua, fa’atumuhia e te mau ‘oti’a ‘ihirave’a ‘aravihi e fa’arava’ira’a faufa’a no te ‘operera’a pe’e ‘utari no te pupa reni a Polysat, o tei riro ia ei mana’ona’ora’a na Porinetia farani. Na teie mau rave’a fa’anahora’a ‘api e fa’ahotu mai i te fa’arava’ira’a faufa’a a te mau motu atea e na te reira e fa’a’ohie mai i te fa’a’ohipara’a i te ‘ea-rorouira, te ha’apiira’a-rorouira e te fa’aterera’a hau-rorouira, ma te ’ore e ha’amo’e i te mau rave’a no te parurura’a no te fa’aorara’a na ni’a i te moana na roto i te mau pou teitei o te fa’a’ohipahia e te mau pou no te mau pupa reni hereteti.

No te mataara ha’afaufa’a i te putuputura’a iho hiro’a fenua o te mau Ta’amotu, te ateateara’a e te mau ‘opuara’a fa’arava’ira’a faufa’a i ‘iteahia mai, ua mana’ohia e fa’atu’ati :

- Na roto i te mau niuniu na raro i te moana i te motu no Tahiti :
o I Matuita ma : Nuku-Hiva e Hiva Oa
o I Tuamotu ma : Rangiroa, Manihi, Takaroa, Arutua, Kaukura, Fakarava, Makemo e Hao

- Na roto i te reni hereteti, mai :
o No Matuita ma
 Nuku Hiva : Ua Pou e Ua Huka
 Hiva Oa : Tahuata. Fatu Hiva e titauhia ia e rave i te mau tuatapapara’a ta’a-è.
o No Tuamotu ma
 Rangiroa : Tikehau
 Manihi : Ahe
 Takaroa : Takapoto
 Arutua : Apataki
 Fakarava : Faaite
 Hao : Amanu

No teie taime, ‘aita o Tuha’apae ma e o Ma’areva ma to roto i taua ‘opuara’a ra. Te fa no taua mau tuatapapara’a ra, o te fa’aotira’a ia i te mau fa’anahora’a e oti mai na roto i te fa’atu’ati’atira’a e no ni’a ihoara i te mau tuatapapara’a i te mau tahora miti papa’u rii e te mea hohonu mai te hi’opo’ara’a no te hohonura’a o te moana, no te hi’opo’ara’a i te huru no te mau aroaro one, no te ‘auanatura, no te hoho’a o te mau hohonura’a moana e te raranira’a i te mau torora’a ‘e’a na raro i te moana hou a’e a tu’uhia’tu ai te mau niuniu na raro i te moana.

Ua matutuhia te ho’o no te tuha’a o te mau tuatapapara’a i ni’a i te 250 mirioni toata farane, ma te amohia’tu ho’e tuha’a faufa’a moni e te ‘Afata Ta’a-è no te Fa’ahotura’a 2016 (ATF=FEI), e no te mau fa’aaura’a e roa’a ai te reira e no te fa’a’ohipara’a i te reira, e tu’uhia’tu ia i mua i te ‘Apo’ora’arahi no Porinetia farani, o tei fariihia mai e te ho’e fa’aotira’a mana no te 25 no ‘atete i ma’iri a’e nei. E toe noa atura ia Porinetia farani i te horo’ara’a i taua tauturu moni ra e te fa’atupura’a i taua tapura ‘ohipa ra a te EPIC OPT ia au i te mau rave’a ‘ihi rave’a e i te mau fa’aturera’a no te fa’a’ohipara’a o tei fa’aotihia i roto i te fa’aaura’a Haufenua-Pu Farerata e no te mau Taniuniura’a.


Tauturu mono na te Tupa’ira’a ‘animara no Tahiti

Te tupa’ira’a ‘animara no Tahiti i Papara, o te pu ‘otahi roa ia o te nehenehe e fa’aineine mai i te ‘i’o ‘animara ia au i te mau rave’a ‘aravihi e te mau fa’aturera’a titauhia e te ture, a nehenehe atu ai e tapiho’ohia ia au a i te titaura’a ‘eta’eta a te ture. O te reira noa ato’a ana’e te pu no te mau ‘i’o pua’atoro e pua’a, o tei fa’atupu mai 1 260 rahira’a ti’ara’a ‘ohipa i roto i ta’ato’ara’a o te mau Ta’amotu : te horo’a mai nei taua tupa’ira’a ‘animara ra e 30 % no te rahira’a ‘i’o pua’a e ‘aimamauhia nei i Porinetia farani nei. Na te taiete fa’arava’ira’a mita, SAEM Tupa’ira’a no Tahiti, e ti’a’au nei i taua pu ra.

No te fa’ahepora’a e horo’a , no te mau tumu no te ‘ea o te huira’atira e o te ‘aua natura, na te reira i tae mai ai te huru faito maita’i no taua tupa’ira’a ‘animara ra i ni’a i te faito maita’i rahiroa, no ta’na ihoa mau tareni, i roa’a ato’a mai ai ta’na Parau Fa’ati’a a te Hau (DSP=PFH). Na roto i te reira fa’anahora’a fa’aau e no ta’na mau papature, no reira e mea titauhia ia te SAEM ia rave mai mai i te mau tapura ‘ohipa ato’a no te fa’aineinera’a mai i te ‘i’o ‘animara iaau i te titaura‘a a te ture no te ‘Ea, te fariira’a i te mau ‘animara no te fariira’a atu i te mau tino ‘animara.

Teie ra, te SAEM, noa’tu e o ‘oia ana’e te maura’a i taua tareni ra, te ti’a ato’a nei ‘oia i roto i te ti’ara’a pau i te matahiti, ia au i te titorotorora’a a te piha ‘aivana’a no te ti’a’aura’a i te tia’ira’a faufa’a e a te totaiete titorotoro o tei fa’auehia e e hi’opo’a i te mau mni ‘ohipara’a o tei fa’a’inoroahia mai na roto i te topara’a te tareni tupa’ira’a ‘animara. Ua farii te ‘Apo’ora’ahau i te tu’ura’a mana’o o te Peretiteni no Porinetia farani no te horo’a, i teie matahiti 2016, i te ho’e tauturu moni rava’i na te SAEM no te fa’ati’a fa’ahoura’a mai ‘oia i ta’na faufa’a moni.


Tauturu i te Aupupu a te Feia fa’a’amu pua’a

I muri a’e i te mana’o o te Tomite no te horo’ara’a i te mau tauturu, ua farii te ‘Apo’ora’ahau e horo’a i te ho’e tauturu moni na te Aupupu a te Feia Fa’a’amu Pua’a no Porinetia farani, peretitenihia e Eric Coppenrath.

Ua fa’ata’ahia te reira tauturu, no te fa’a’ohipara’a i te tapura ‘ohipa mape’era’a ‘ihi rave’a ‘aravihi na roto i te fa’anahora’a tuatapapa hohonura’a i te mau fa’a’amura’a ‘animara ia ‘iteahia mai te mau rave’a ‘aravihi ‘api, tera ra, no te ha’ape’epe’e ato’ara’a i te mau fa’anaho fa’ahoura’a / te mau fa’a’apira’a hina’aro rahihia na roto mai i te tuha’a no te mau fa’a’amura’a fanaura’a-poria maita’i e tae atu i te fa’a’amura’a / ha’aporiara’a. E riro te reira mau titorotorora’a ei mau titorotorora’a ‘ihi rave’a-fa’arava’ira’a faufa’a, fa’anahora’a tapura ‘ohipa (te ho’e autano maitera’a te mau fare, te tareni, te arata’ira’a fa’a’amura’a) ma te tapirihia mai i te mau fa’anahora’a ferurihia mai no te ha’amara’ara’a i te mau tuha’a ma te piritihia mai e te mau hoho’a paturura’a.


Mau tapura no te mau Rerera’a Manureva tamau na te ara no te pu’etau IATA Tau Hiona 2016

Ia au i te mau fa’aturera’a no te fa’aotira’a mana no te 13 no tiunu 2002, ua tu’u mai te mau Taiete Anureva no te mau Rerera’a na te Ara e ma’ue mai nei na Porinetia farani nei, ia ha’amanahia’tu, i ta ratou mau tapura no te mau rerera’a no te pu’etau Hiona 2016, o te tai’o mai te 30 atu no ‘atopa 2016 e tae atu i te mati 2017.

Mai teie i muri nei te fa’anahora’a no taua mau rerera’a ra :
- E 8 e tae atu i te 11 rahira’a rerera’a i te hepetoma na te Taiete Air Tahiti Nui, ma’ue ti’atu i Los Angelès, e 3 rerera’a hepetoma i Auckland, e 2 e aore ra e 3 rerera’a hepetoma i Tokyo, na ni’a i te A340 e 296 parahira’a horo’ahia.
E rave rahi mau fa’aaura’a autaipe no te fa’a’a’ano atu i te reni a Air Tahiti Nui i ‘Auteraria, i Korea Apato’a, e i roto i te mau ‘Oire rarahi no Marite. E nehenehe ato’a taua reni ra e aveave ato’a atu i Tanata e i Peretiria, ia ha’amana ana’ehia mai e te Fa’aterera’a no tau na Fenua ra.
- E 3 rerera’a hepetoma na te taiete Air France i ropu ia Papeete e o Los Angelès na ni’a i te B777-200 e 309 rahira’a parahira’a.
- E 2 e aore ra e 3 rerera’a hepetoma na Air New Zealand i Auckland. E fa’a’ohipa mai taua taiete ra i teie pu’etau i te ho’e manureva ‘api, te B787-9 (Dreamliner), o te nehenehe e ha’amara’a e 72 rahira’a parahira’a i te rahira’a parahira’a e horo’a noahia mai na i ni’a i taua rerera’a ra, o te mara’a mai te 230 i ni’a i te 302 rahira’a parahira’a i te ta’ato’ara’a (18 i roto i te piha Feia ‘Ohipa Rarahi, e 21 i roto i te piha Premium, e 263 i roto i te piha Mama) ;
- 1 rerera’a hepetoma na te taiete Hawaiian Airlines i Honolulu, na ni’a i te A330-200 e 290 parahira’a ;
- 1 rerera’a hepetoma na te taiete LATAM i Santiago i Tireni na te Fenua Pata atu, na ni’a i te B787-9 e 279 parahira’a ;
- 1 e aore ra e 2 rerera’a hepetoma na te taiete Air Tahiti i Rarotonga, ma te autaipe e o Air Rarotonga, na ni’a i te ATR 42 e 38 parahira’a.

E tape’a noa te taiete Qantas i to’na autaipera’a e o Air Tahiti Nui ma te horo’a mai i ta’na ihohiro’a i ni’a i te mau rerera’a i Los Angelès e Auckland.


Tape’ara’a i te mau moniho’o o te mau mori i te 1 no novema

No te ha’amau i te mau moniho’o o te mau mori ‘arahu fa’a’ohipahia i te 1 no novema 2016, ‘aita ho’e iti noa a’e e titora’a mori pape i ravehia i roto i te pu’etau no te matutura’a i te mau moniho’o. Ia ‘itehia maira, ua topa te moniho’o o te mahu auahi i te ‘atopa nei. Ua ha’amana te ‘Apo’ora’a a te mau Fa’aterehau e tape’a noa i te moniho’o o te mau mori ‘arahu i roto i te ‘ava’e no novema.


Ha’amaura’a i te fa’anahora’a Tauturu i te ta’amura’a i ni’a i te tahua natirara i te mau taiete

Mai te mea, te faito ta’amura’a i te mau taiete rarahi porinetia, ua piri i te 100 %, ‘are’a te mau taiete rii na’ina’i tei raro mai i te 10 rave ‘ohipa ta ratou, tei ni’a noa ia i te 72 % , no reira e area rahi tei rotopu ia ratou e vaira. I te tahi atu pae, ua ‘iteahia mai e mea rahi te ta’a-è-ra’a ia au i te mau ta’amotu e te mau tuha’a tareni, o te ti’a ia ha’amaita’ihia te mape’era’a itaua mau taiete porinetia ra no te ta’amura’a ia ratou i ni’a i te rorouira.

No taua mau tumu ra, ua hina’aro te ‘Apo’ora’ahau no Porinetia farani, no te fa’aitira’a i te ta’a-è-ra’a e ha’amau i te ho’e fa’anahora’a Tauturu no te Ta’amu i taua mau taiete ra i ni’a i te tahua Natirara (ACE=TTN). Te fa a te TTN (ACE° o te fa’a’ohiera’a ia i te ta’amura’a i ni’a i te tahua natirara i te mau taiete ia au i te mau rave’a ‘aravihi e vaira i te Fenua nei (Aroaro mata e tae roa’tu i te ta’amu atu, ADSL, WIMAX, etv), e te reira, noa’tu e o vai te pu ha’apurorora’a.

Te TTN (ACE) o te ho’e ia tauturu moni na te mau ta’ata e ‘ere i te mau ta’ata tihepu ‘aufau tamonihia, o te fa’a’ohipa ra ra i ta ratou tareni mai te huru no te ho’e taiete ta’ata ‘otahi i Porinetia farani nei (feia fatu patana), o te fa’atupu ra e aore ra o fa’ahotu ra. E ‘ohipa te TTN (ACE) na roto i te ho’e paturu monira’a ti’apiti no te mau moni tute o te mau ha’amau’ara’a no ni’a i te mau mauha’a, e te mau niura’a hina’arohia, no te ta’amura’a i ni’a i te natirara. ‘Eita te amora’a a te Haufenua e pa’i’uma atu i ni’a atu i te 70 % no te mau ha’amau’ara’a tute a te taiete i ni’a ia i te faito 100 000 toata farane. Te mau ha’amau’ara’a e fariihia no ni’a ia i te ta’amura’a i ni’a i te reni a te pu ha’apurorora’a no te taniuniura’a, te ha’amaura’a roto a te taiete (te reni matini rorouira), te mau natira’a rorouira e te mau ta’amura’a.

Te mau ta’ata ato’a e hina’aro i te ha’amaramaramara’a, i te mau fa’aa’ora’a, no te ‘iriti e aore ra no te tu’u i e ho’e anira’a TTN (ACE°, e nehenehe ia ‘oia e ani noa’tu i e Fa’aterera’a Rahi no te Fa’arava’ira’a Faufa’a Rorouira (DGEN= FRFR) no te Fa’arava’ira’a Faufa’a Rorouira– www.dgen.pf, niuniu. : 40 544 860, tahua matamua no te Fare Tahua Toriki, 115 rue Dumont D’Urville – Papeete, mau hora matarara’a : hora 7 e te ‘afa i te po’ipo’i e tae i te hora 5 i te ahiahi, ma te fa’afa’aea ‘ore.


Parau ha’apapa no te Rurura’anui fa’arava’ira’a faufa’a e no te Forum fa’arava’ira’a faufa’a

E piti nau fa’anahora’a faufa’a rahi no te fa’arava’ira’a faufa’a a to tatou nei Fenua o tei fa’atupuhia mai te 10 e tae mai i te 12 no ‘atopa i ma’iri a’e nei. Ua tupu te piti no te Rurura’anui fa’arava’ira’a faufa’a no teie matahiti 2016 i te monire 10 no ‘atopa, i mua hau atu i te 300 rahira’a ta’ata o tei ‘amui atu, mau ti’a no te ao o te fa’arava’ira’a faufa’a e no te mau Pumana (‘Apo’ora’ahau, ‘Apo’ora’arahi, ‘Apo’ora’a Matutu Ti’arau Matau’i).

Ua riro te Rurura’anui fa’arava’ira’a faufa’a ei rave’a e farerei ai te mau ti’a no te ao o te fa’arava’ira’a faufa’a, o te ‘Apo’ora’ahau e o te tahi è atu a mau Pumana ia farerei no te hi’ora’a i te ti’ara’a o te fa’arava’ira’a faufa’a a te Fenua nei, e no te fa’aotira’a e no te fa’atanotanora’a i te mau fa’anahora’a tapura ‘ohipa. I muri a’e i te tahi fa’ahi’ora’a a te ISPF e a te IEOM no ni’a i te fa’arava’ira’a faufa’a porinetia, ua vauvau mai te Peretiteni e ta’na mau Fa’aterehau i te nu’ura’a no te hoho’a tapura ‘ohipa fa’arava’ira’a faufa’a a te ‘Apo’ora’ahau e te mau reni ‘avei’a rarahi roa no te ‘Afata terera’a faufa’a 2017 a te Fenua. Ua tu’atihia mai te Rurura’anui na roto i te fa’aterera’ahia e 3 Piha ferurira’a mana’o o tei fa’a’amu i te mau ti’a no te MEDEF, no te CGPME, e no te CCISM, e to te ‘Apo’ora’ahau ihoa ia. Ua fa’aotihia ia fa’atupuhia te reira Rurura’anui e piti taime i te matahiti, to mua nei, ua tapa’ohia ia no te piti o te toru ‘ava’e no 2017.

I muri mai, ua tupu ato’a mai te Forum fa’arava’ira’a faufa’a matamua roa no Porinetia farani, i te mahana piti 11 e te mahana toru 12 no ‘atopa, ma teie parau tumu, te niu fa’ahoura’a i te fa’arava’ira’a faufa’a porinetia. Taua Forum o tei tu’uhia i raro te patoronara’a hanahana a te Peretiteni no te Repupirita, ua ‘iritihia e te Peretiteni no Porinetia farani e na te Papa’iparau Rahi o te Tomitera Teitei. Hau atu i te tauatini rahira’a ta’ata o tei tae atu i roto i na mahana e piti ra no te vauvaura’a parau/tau’aparaura’a, horo’ara’a mana’o e tau’aparaura’a.

Te mau parau no te fa’arava’ira’a faufa’a rorouira, te fa’arava’ira’a faufa’a fa’a’ohu, te ti’ara’a ‘ohipa, te fa’arava’ira’a faufa’a ninamu e te fariira’a ratere tinito o tei tatarahia mai e te mau ‘aivana’a rurura’a rarahi no Tanata mai, no Taina mai, no ‘Auteraria mai, no Matinita mai e no Farani mai. I te hopera’a taua Forum ra, ua fa’aho’ihia mai te mau pu’ohura’a mana’o. Ua ‘otahi te mau mana’o i te fa’aotira’a e mea faufa’a ia ha’amauhia te mau fa’anahora’a ‘aravihi no te fa’arava’i i te niu fa’ahoura’a i te fa’arava’ira’a faufa’a a te Fenua.

Ua ha’apoupou te mau pu rarahi roa no te Fenua nei i taua mau fa’anahora’a ra, mai te MEDEF e te CGPME, o tei hina’aro ia fa’ahaere fa’ahouhia te reira i te matahiti 2017.


Mau fa’aotira’a mana ‘api no te parurura’a i te mau ‘aimamau

Na roto i te ha’amanara’ahia te Ture ‘Āi’a no te 11 no ‘atete i mā’iri a’e nei no ni’a i te parurura’a i te mau ‘Aimamau, e mea ti’a ia ha’amanahia te mau fa’aturera’a no te fa’a’ōhipara’a no te fa’aau maite maita’ira’a i te fa’a’ōhipara’a i taua fa’aturera’a ‘āpi ra.
E maha mau fa’aotira’a mana o tei ha’amanahia no ni’a i te mau ha’amaramaramara’a e vaira roto i te mau titaura’a rarahi no te ho’ora’a ia au i te fa’ata’ara’a a te ture, no te parurura’a i te mau ‘aimamau i mua i te mau ho’ora’a ti’a ‘ore, te mau parau fa’aau no te ho’ora’a i te mau metara piru e i te mau mana o te mau muto’i, no te fa’a’ōhipara’a i te mau fa’autu’ara’a a te hau e no te mau ‘ōhipa terera’a ture.
• Taua mau fa’aotira’a mana ra, mai te Ture ‘Āi’a ato’a ra, e mana mai ia rātou i te 1 no fepuare 2017. No reira, e vaiihohia ia e ono ‘āva’e i te mau ti’a toro’a no te fa’atanora’a i ni’a i taua fa’aturera’a e no te fa’a’orera’a ihoa i roto i ta rātou mau parau fa’aau no te ho’ora’a i te mau fa’anahora’a ti’a ‘ore. E hamanihia te tahi puta arata’i na te mau ti’a toro’a i mua nei e te Fa’aterera’a rahi no te mau ‘Ōhipa tapiho’ora’a no te tauturu ia rātou ia ‘ite e ia fa’aore i te mau fa’aaura’a ti’a ‘ore i roto i te mau parau fa’aaura’a e i te mau titaura’a no te parau fa’aau o ta rātou e hamani mai. E ‘iteahia te reira i ni’a i te tahua natirara i muri nei : www.dgae.gov.pf.


Horo’ara’a i te tauturu moni na te ta’atira’a TEDx Papeete


Ua farii e ‘Apo’ora’a a te mau Fa’aterehau i te ho’e fa’aotira’a mana no tehoro’a i te ho’e tauturu moni na te ta’atira’a TEDx Papeete no te fa’atupu i te mau TEDx Papeete Women 2016.

Fa’anahohia mai, mai te 1984 maira, na te ho’e ta’atira’a ‘oia ho’i, te Sapling foundation, te mau rurura’a TED (‘Ihi rave’a ‘aravihi, Fa’a’ana’anataera’a e Penira’a) o tei fa’aoti ei tareni na rato te ha’apurorora’a i te mau mana’o no te niu i te ho’e totaiete hi’ora’a. Ua hamanihia te mau rurura’a i ni’a i te hoho’a 18 minuti te roa (‘ihi ma’imira’a, rahu’ara’a, porotita, hamanira’a hoho’a fare, ‘upa’upa, mau uira’a no te ao nei) o tei ‘amui mai i te mau ‘aivana’a tu’iro’o atoa.

Ha’amauhia i te 2013 na roto i te huru no te ho’e ta’atira’a fa’aterehai e teture no 1901, te TEDx Papeete ua haru mai ia i te parau tu’ite « licence » a te niura’a TED no te fa’atupu i te mau TEDx i Porinetia farani nei, o tei riro ei Fenua matamua roa no Patitifa Apato’a o te fa’atupu i te reira fa’anahora’a. Te parau tumu a te mau TEDxPapeeteWomen 2016 o teie ia « It’s about time – le temps est venu - Ua tae i te taime ». Ia au i te huru hoho’a no te 2015 ra, e ha’afaufa’ahia te mau vahine no Porinetia farani i roto i te mau tuha’a ato’a, no te fa’aitoito i to ratou mau tau’a ia riro ei mau ‘aito ha’uti no to ratou iho ‘ananahira’a e no te tauira’a e ti’a i te vaira’a.


Rave’a no te fa’atiani i te Feia ‘api porinetia no te matahiti 2020

Ua ha’afaufa’a te ‘Apo’ora’a a te mau Fa’aterehau i te parau fa’aara a te Fa’aterehau vahine ti’a’au i te Feia ‘Api no ni’a i te Rave’a no te fa’atiani i te feia ‘api porinetia no te area matahiti 2020. Ua fa’atumu te Fa’aterehau vahine i ni’a i te tu’atira’a e tuatapapahia i roto i te ‘Apo’ora’a Rahi a te Feia ‘Api o te tupu i tei tupu na i te 25 e 26 no fepuare i ma’iri a’e nei i te Peretitenira’a, mai te haere’a rave’a ‘aravihi no te fa’ati’ati’a i te mau hia’aira’a o te Feia ‘Api. E pu’ohu te reira rave’a i te fa’anahora’a tapura ‘ohipa fenua e ti’a e fa’aineine i te feia ‘api no te tomora’a i roto i te ora’a totiare.

Ua hamanihia te reira rave’a ia au i te mau mana’o o tei ‘amui mai na i roto i taua Rurura’a Rahinui ra : te mau piahi no te mau Fare Ha’apiira’a Pirituarua, no te mau Fare Ha’apiira’a Tuarua, te mau piahi no te Fare Ha’apiira’a Tuatoru (UPF) e te Pu Teitei no te Ha’apiira’a Unuma a Porinetia farani (ISEPP°, te feia ‘api no te mau ta’atira’a feia ‘api e no te ha’apiira’a, te feia ‘api no te mau ‘amuitahira’a tu’aro, te fei’a ‘api « nohora’a tumu ‘ore », te mau mau‘auri no Nu’utania, tera ra, ia au ato’a i te fa’atitora’a e te mau fa’aotira’a a te mau Rurura’a rahi no te mau Fetii.

Ua riro te reira rave’a ei fafaura’a papu no te horo’a i te feia ‘api Pornetia i te mau rave’a hau atu i te fa’ahiahia o te fa’aitoito ia ratou e ha’afaufa’a i to ratou mau ‘aravihi ei tuha’a horo’a na ratou no te orara’a totiare ia maita’i, no te fa’arava’ira’a faufa’a e no te ta’ere o te totaiete porinetia. Ua ha’apapu mai te Fa’aterehau vahine ua natihia te rave’a fa’atianira’a i te feia ‘api no te area matahiti 2020 i ni’a e 5 parau tumu rarahi : te ti’ara’a ‘ohipa, te ‘ananahira’a, te ‘ea, te mau fa’a’ana’anataera’a e te ‘utuafare fetii.


Horo’ara’a i te mau Tauturu moni no te terera’a ‘ohipa roto a te mau ta’atira’a tu’aro e a te feia ‘api


Ua hi’opo’a te ‘Apo’ora’a a te mau Fa’aterehau i te faito e 20 mau anira’a tauturu moni no te ho’e faito ta’ato’a piri i te 80 mirioni toata farane. No te paturu faufa’a monira’a i te mau tapura ‘ohipa rarahi a te mau ta’atira’a tu’aro, teie i muri nei te mau tauturu moni o tei horo’ahia :
- Ta’atira’a Tu’aro Dragon, no te faito e 2 398 000 toata farane ;
- Ta’atira’a Tu’aro Central Olympic, no te faito e 719 400 toata farane ;
- Ta’atira’a Tu’aro Fa’a'a rugby Aro Académy no te Rugby no ‘Oremu, no te faito e 559 500 toata farane ;
- Ta’atira’a Tu’aro Fei Pi, no te faito e 2 398 000 toata farane ;
- te AS Cercle te feia ‘Au no Porinetia, no te faito e 719 400 toata farane ;
- te AS ‘Ama’a Tu’aro Tefana Tu’era’a popo, no te faito e 1 799 300 toata farane ;
- te AS Sportive Taravao Athlétic Club, no te faito e 639 400 toata farane ;
- te AS Sportive Aorai, no te faito e 1 151 000 toata farane ;
- te AS Tahiti Judo Discovery, no te faito e 559 500 toata farane ;
- te AS Club Fa’ahorora’a Pua’ahorofenua no Tahiti, no te faito e 559 500 toata farane ;
- te AS Central Sport, no te faito e 2 398 000 toata farane ;
- te AS Taiarapu Tu’era’a popo Club, no te faito e 559 500 toata farane ;
- te AS rugby Club no Pirae, no te faito e 559 500 toata farane ;
- te AS Rotui Tae Kwon Do Club, no te faito e 519 500 toata farane ;
- te AS Pirae Volley Club, no te faito e 1 719 400 toata farane ;
- te AS Feia ‘api Tu’aro porinetia, no te faito e 559 500 toata farane ;
- te Ta’atira’a Feia ‘api Club Tennis Rautea, no te faito e 639 400 toata farane ;
- te Ta’atira’a Tu’aro Vaiete, no te faito e 799 300 toata farane ;
- te Ta’atira’a Tu’aro Manu Ura, no te faito e 1998 300 toata farane ;
- te Ta’atira’a Budokan Judo, no te faito e 559 500 toata farane ;

Ua horo’a ato’ahia te mau tauturu moni no te terera’a ‘ohipa roto na te mau ‘Amuitahira’a i muri nei :
- te ‘Amuitahira’a tahiti no te taekwondo e mau pipi fa’ataiete mai, no te faito e 2 471 000 toata farane ;
- te ‘Amuitahira’a tahiti no te te’ara’a, no te faito e 1 504 000 toata farane ;
- te ‘Amuitahira’a no horora’a atea, no te faito e 4 850 000 toata farane (‘oia ho’i e 3 000 000 toata farane tauturu ti’ara’a ‘ohipa no te fa’atere rave’a fetere);
- te ‘Amuitahira’a no te ta’ahira’a pere’o’o, no te faito e 4 420 000 toata farane (‘oia ho’i e 3 000 000 toata farane tauturu ti’ara’a ‘ohipa no te fa’atere rave’a fetere);
- te ‘Amuitahira’a no te Tu’era’a popo Marite, no te faito e 1 040 000 toata farane;

E piti tauturu moni o tei horo’a ato’ahia na te IJSPF, no te ho’e faito ta’ato’a e 43 450 000 toata farane, no te paturu monira’a i te fa’atupu ti’apitira’a i te mau fa’anahora’a tu’aro rarahi no teie matahiti 2016.


Tauturu moni no terera’a ‘ohipa roto na te ‘Amuitahira’a Tahiti no te ‘Au

Na roto i te anira’a a te Fa’aterehau no te ‘Ea e no te ‘Ihi Ma’imira’a, ua farii te ‘Apo’ora’a a te mau Fa’aterehau e horo’a ho’e tauturu moni i ni’a i te faito e 700 000 toata farane na te ‘Amuitahira’a Tahiti no te ‘Au no te ‘aufau i te mau ha’amau’ara’a no te terera’a ‘ohipa roto no ni’a i te ‘opuara’a « Aura’a no te ora – ‘Au, Tino maita’i, ‘Ea i Porinetia » no teie matahiti 2016. Ua fa’a’api fa’ahou te ‘Apo’ora’ahau i ta’na turu i taua tapura ‘ohipa ra fa’ata’ahia no te fa’ahotu i te ‘aura’a i roto i te mau ta’ata o tei ro’ohia i te mau ma’i pu’etau maoro.


Tauturu i te Ta’atira’a no te ‘aro i te Ma’i mariri ‘aita’ata

Ua ha’amana te ‘Apo’ora’a a te mau Fa’aterehau e horo’a i te ho’e tauturu moni no te ho’e faito 1 500 000 toata farane, na te Ta’atira’a Haunui no te ‘aro i te Ma’i mariri ‘aita’ata no te terera’a ‘ohipa roto o ta’na mau tapura ‘ohipa no teie matahiti 2016. Ha’amauhia i te matahiti 2006, e ‘ite-au-hia no te maita’i o te ta’ato’ara’a mai te 2011 maira, te tapi ha’a nei te Tomite no Porinetia farani no te Ta’atira’a Haunui no te ‘aro i te Ma’i mariri ‘aita’ata e ‘amui i te mau ta’ata ato’a o te hina’aro ra e tauturu i te ‘arora’a i te Ma’i mariri ‘aita’ata, te fa’atianira’a, te ha’afaufa’ara’a e te tu’ati’atira’a i te mau ha’ara’a unuma o te titau ra e ha’amaita’i i te ‘arora’a i te ma’i mariri ‘aita’ata, e te tauturura’a i te fei’a ma’i o tei ro’ohia i te ma’i mariri ‘aita’ata e to ratou mau ‘utuafare fetii.

Te fa’a’ite ra te ‘Apo’ora’ahau na roto i te reira tauturu moni, i ta’na turu i te mau tapura ‘ohipa o te arata’ihia nei e te Ta’atira’a no te ‘arora’a i te ma’i mariri ‘aita’ata, o ta’na i ta’amu papu maita’i atu i te aura’a hotu a rave rahi mau matahiti i teie nei. Te fa’atupura’a i te fa’anahora’a Le gouvernement affiche, au travers de cette aide financière, son soutien aux actions menées par la Ligue contre le cancer, avec laquelle il a su nouer un partenariat efficace depuis plusieurs années. L’organisation de l’événement « ‘Atopa tarona », ma te autaipe e te Fa’aterera’a no te ‘Ea, o te fa’a’ite maira i te maita’i no te reira autaipera’a.