Tahiti Infos

Ma'i hi : E piti pepe o tei fa'aru'e mai


Ua ro'o ato'a na pepe to'opiti i teie ma'i. Aua'e maoti, ua rapa'au-ru-hia raua i te fare ma'i no Ta'aone
Ua ro'o ato'a na pepe to'opiti i teie ma'i. Aua'e maoti, ua rapa'au-ru-hia raua i te fare ma'i no Ta'aone
PAPEETE, le 27/08/2015 - Ho'e hepetoma i teie nei te fa'aru'era'a mai ho'e pepe tamahine i roto i te hituraa o tona 'ava'e. I teie hepetoma, 'eie fa'ahou mai te ho'e pepe e 5 'ava'e o tei fa'aru'e-ato'a-mai. Ua ro'o na pepe to'opiti i te ma'i hi e te pi'i nei te fa'aterera'a no te ea i te huira'atira e ia vai ara maita'i i mua i teie ma'i.

Mahana pae 21 no 'atete, ho'e pepe tamahine e 7 'ava'e tona o tei fa'aru'e mai i Taravao. Ua ro'ohia e oia i te ma'i hi. Ma'i o tei 'u'ana i teie mau mahana i te fenua nei e o tei fa'aruru-rahi-hia e te mau pepe 'aru'aru e te feia pa'ari.

Mai te 'ava'e no tiunu, tauatini ti'ahapa feia i ro'ohia i teie ma'i, te rahira'a o te mau tamari'i ia. Ua fa'auta-ru-hia ratou i roto i te mau fare ma'i.

I Mo'orea, ho'e pepe e 5 'ava'e o tei fa'aru'e-ato'a-mai i teie hepetoma. Ua ro'o oia i teie ma'i, e te fifi rahi, aita i rava'ai te pape i roto i tona tino.

No reira, ia ro'o ana'e-hia outou i teie ma'i, e iti ato'a mai te pape i roto i to outou tino, inaha, e piha'e outou, e hi to outou e, e fiva hia ato'a outou. Noa atu e taime poto noa outou i te ro'ora'a hia i teie ma'i, e nehenehe ra te reira e ha'afifi maita'i i to outou tino, mai te peu aita i rava'ai te pape i roto. E te feia o tei titau hia e ia vai ara maita'i o te mau pepe 'aru'aru, te mau tamari'i e te feia pa'ari.


A ARA MAITA'I I ROTO I TE MAU FARE HA'API'IRA'A

Ia au i te mau tuatapapara'a a te mau taote, te 'ite-hia-nei te mara'ara'a o te feia i ro'o i teie ma'i, mai te ha'amatara'a ha'api'ira'a.

No reira, e titau hia e ia ha'apa'ari hia te mau fa'auera'a i roto i te mau fare ha'api'ira'a tamahau ihoa ra. Inaha, "ua 'ite tatou te huru o te mau tamari'i, mea au roa na ratou e rave i te ho'e tauiha'a, e tu'u atu ai i roto i te vaha", e reo teie mai roto mai i te pu araira'a no te ea.

NAHEA TEIE MA'I I TE RO'OHIA ?

E nehenehe outou e ro'o i teie ma'i ma te tape'a i te rima o te feia ma'i, o tei 'ore i horoi hia.

No te arai i te reira, e titau hia i te ta'ato'ara'a e ia horoi-pinepine-hia i to 'outou mau rima, ia haere ana'e outou i te fare haumitira'a.

Titau-ato'a-hia e fa'ainu-rahi i ta outou mau tamari'i i te pape, na reira ato'a i te feia pa'ari.

Mai te peu noa atu, e taui te huru o ta outou mau tamari'i ('aita oia i ha'uti fa'ahou, ua taui tona hoho'a mata, tona 'iri), a haere 'oi'oi e farerei i ta outou mau taote, ia nehenehe teie ma'i e rapa'au maita'i hia.


PORITITA

Ua ho'i o Jacques Raioha i roto i te pupu puatou

Ua topa teie parau 'api a mahana piti ra. I roto i te rurura'a a te mau mero no te fare 'apo'ora'a rahi, aita o Jacques Raioha i 'amui atu. Teie ra, ua fa'a'ite oia, i roto i te ho'e rata i te peretiteni no Tarahoi, Marcel Tuihani, e vai noa oia i rotopu i te pupu Tahoera'a Huira'atira.
Ei fa'a ha'amana'ora'a, a mahana ma'a ra, ua fa'a'ite oia e ua fa'aru'e oia i te pupu puatou no te haere atu i roto i te pupu Tapura Huira'atira.
No reira, i teie po'ipo'i, e ho'i mai te peretiteni no te pupu puatou i te fenua nei, no te fa'a'afaro i te mau fifi farerei hia e tana pupu poritita.

TE ARUTAIMAREVA

E riro te mau poromu no Papeete i te tape'a hia

A mahana piti ra, ua putuputu te ta'atira'a "Te Aru Tai Mareva", peretiteni hia e Denis Helme i mua i te fare 'apo'ora'a rahi, no te fa'a'ite i to ratou mana'o hepohepo i mua i te huru o te fa'aterera'a o te Hau Fenua. Aita te fa'aterera'a i pahono noa a'e i ta ratou mau anira'a, maoti ra, e ia ha'amau hia te tahi mau tomite hi'opo'a i roto i te mau 'oire. Te fa : te fa'aturera'a i te mau heru ra'a i roto i te mau 'anavai no te fenua nei. Mai te peu, e'ita te mau ti'a poritita e horo'a i ta ratou mau fa'aotira'a i ni'a i teie tumu parau, e riro te mau ta'atira'a e paruru nei i te parau no te arutaimareva, i te tape'a i te mau poromu no Papeete.

HA'API'IRA'A

E 'iriti te fare ha'api'ira'a tuarua no Teva i Uta i teie matahiti i muri nei.

Ua tere te peretiteni no te Hau Fenua, Edouard Fritch e mata'ita'i i te nu'ura'a o te mau patura'a no te fare ha'api'ira'a tuarua no Teva i Uta, a monire ra. 1,6 miria farane toata o ta te Hau Fenua i tu'u atu no teie 'opuara'a. Te vahi papu, te fatata ra te mau patura'a rarahi i te oti. Te tohu nei te fa'aterera'a o te Hau Fenua e ia oti mai te reira i te area 'ava'e 'eperera-me 2016, no te fari'i i na piahi e 600 i te 'ava'e no 'atete 2016.

TU'ARO

O Jérémy Flores, te 'aito no te tata'ura'a Billabong Pro 2015

No 'o mai teie ta'ata i te fenua Reunion, ua fa'aea ato'a oia ia Hinarani De Longeaux, purotu no Tahiti 2012. O oia ia te Aito 'api no teie tata'ura'a rahi Billabong Pro o tei hope a mahana piti ra. Ua manuia oia i mua ia Gabriel Medina, te 'aito i te matahiti i ma'iri a'e nei. Teie ato'a te taime matamua, ho'e ta'ata farani i manuia atu i roto i teie nei tata'ura'a rahi.


le Jeudi 27 Août 2015 à 16:49 | Lu 954 fois