Tahiti Infos

E ma'iti faahou te huiraatira no Papara


E tupu te ma'itira'a hau i te 28 no atopa i muri nei.
E tupu te ma'itira'a hau i te 28 no atopa i muri nei.
PAPEETE, le 30/07/2015 - Fa'aotira'a teie mai roto mai te Tiripuna Teitei no Pari, a monire ra. Ia au i ta ratou mau titorotorora'a, e riro ra te vai nei te tahi mau 'ohipa ti'a 'ore o tei 'ite hia, i roto i te mau ma'itira'a tavana o tei tupu i te matahiti 2014 ra. E tupu teie ma'itira'a 'api i teie mau 'ava'e i muri nei.

O Bruno Sandras tei mana i roto i teie ma'itira'a tavana 'oire no Papara, o tei tupu na i te 'ava'e no mati matahiti 2014. 178 mau reo hau o tei roa'a hia e ana i mua ia Clément Legayic. I te 'ava'e no tiurai, ua ha'a faufa'a 'ore hia te reira e te tiripuna a te hau no Papeete, i muri a'e to Clément Legayic horora'a i teie ma'itira'a. Te tumu : te tahi ia mau hoho'a o tei fa'atianiani i te ro'o o te tavana tahito no Papara. Ua ha'apuroro-hia te reira i ni'a i te ho'e 'afata teata no te fenua nei e ua oti ho'i te tau ma'itira'a. I mua i teie mau ohipa, ua ha'apapu-ato'a-hia te fa'aotira'a a te Tiripuna a te Hau, e te Tiripuna Teitei. Tona aura'a, e toru matahiti fa'a'erera'a-hia i te ti'ara'a mana a Bruno Sandras.

No Bruno Sandras, 'e'ere ho'i nona te hape : "aita vau e nehenehe e fa'aoti i te mau tapura 'ohipa e vai nei i roto i te ho'e 'afata teata. E'ere na'u i parau atu ia ratou e ia ha'apuroro-hia i tera mau hoho'a. Ua 'ite maita'i te mau papa'i ve'a i te ture, i teie mahana, ua topa te reira i ni'a i to'u tua."


E'ITA O CLEMENT LEGAYIC E NEHENEHE E HORO ATO'A

Mai te mea ra, nana i horo i taua ma'itira'a, tei roto ato'a o Clément Legayic i te fifi. E'ita ato'a oia e nehenehe e horo no teie ma'itira'a i muri nei, inaha, aita oia i fa'a hi'opo'a hia i tana puta faufa'a e te ho'e 'aivana'a e tia'au i taua ohipa ra. Fa'aotira'a o tei ha'apapu-ato'a-hia e te Tiripuna Teitei no Pari i teie monire i topa a'e nei, no te ho'e maorora'a e ho'e matahiti.

"Ua topa teie fa'aotira'a, ua oti ihoa ia. Teie nei ra, i teie mahana, ua ho'e ta matou pupu e te pupu puatou, mai te 'ava'e no fepuare i ma'iri a'e nei. O vau ato'a te peretiteni no te 'amuitahira'a a te pupu Tahoera'a Huira'atira i Papara. Parau mau, e'ita vau e nehenehe e horo atu no teie ma'itira'a tavana i muri nei, e'ita ra e fifi e 'ape'e ato'a vau i te mau mero no te tapura "Papara To'u Fenua" i roto i te tau ma'itira'a."

Te vahi papu, ua fa'aineine-atea-hia teie ma'itira'a e ratou : "ua 'ite a'e na matou e tupu fa'ahou te ma'itira'a i roto i ta matou nei 'oire. Te tumu ato'a ia matou i ha'amata a'e na i ta matou mau tere".

I na po nei, ua ruru atu ratou no te ma'iti i te ti'a o tei horo atu i ni'a i teie tapura ta ratou " Papara To'u Fenua".

E TURU O BRUNO SANDRAS IA CHRISTELLE LEHARTEL

No teie ma'itira'a e piri mai ra, e hi'o-atea ato'a o Bruno Sandras i te reira. Tera ra, "e 'ape'e ato'a vau ia Christelle Lehartel e ta'u pupu no te tau ma'itira'a. Penei a'e e ani-ato'a-hia i to'u mana'o, teie ra, e'ita vau e hina'aro e ia ha'a faufa'a-ore-ato'a-hia i teie ma'itira'a. Te hina'aro nei au e ia tupu maita'i i te reira. Tera ra e tauturu vau ia Christelle Lehartel o oia te upo'o tapura no "Papara Ai'a No Te Hau"". Tapura ato'a o tei mana i te matahiti i ma'iri a'e nei.

No reira, i muri a'e i te fa'aotira'a a te Tiripuna Teitei no Pari, titau hia e ia fa'atupu-hia i te ma'itira'a tavana no Papara i roto i te ho'e area taime e toru 'ava'e. Tona aura'a, e tupu te reira hau i te 28 no atopa i muri nei.

TE TAHI MAU PARAU HURU RAU

Ua 'ere ato'a o Patice Jamet i tona ti'ara'a tavana

I teie hepetoma, ua faaoti ato'a te Tiripuna Teitei no Pari e faa'ere i te ti'ara'a a Patrice Jamet no te ho'e maorora'a ho'e matahiti e te 'afa. Te tumu : aita oia i rave i te ho'e aivana'a e tia'au i te parau no te tapura faufa'a na "Ia Tura O Mahina". I teie taime nei, aita ho'e a'e ha'apapura'a i ni'a i tona mono. Ia au ra i te mau parau e hiti mai ra, turu hia e Lorna Oputu e Gaston Flosse. Mai te mea ra, ua ho'i mai te hau i rotopu ia Gaston Flosse e o Lucas Lucas, e ma'iti ato'a ia na mero e 6 no te tapura "Mahina Ia Ho'e" ia Lorna Oputu. Te vai ato'a ra o Frédéric Fritch, te taea'e a te peretiteni no te Hau Fenua o tei riro ato'a i te horo i ni'a i teie ti'ara'a.
Te vahi papu, e ti'a i te mero e mana mai ananahi, i te roa'a hia e ana, 17 o te rahira'a o te mau reo no roto mai i te 'apo'ora'a oire. E putuputu ratou i te 13 no atete, no te ma'iti i ta ratou tavana.

'Opani hia te 'iri fa'ahe'e "kitesurf" i Moorea

I te 23 no tiurai i ma'iri a'e nei, ua faaoti te 'apo'ora'a 'oire no Moorea e ia 'opani hia teie tu'aro 'iri fa'ahe'e "Kitesurf" i te mau pae Tiahura, Temae e i Tahiamanu.
Te tumu : te tahi fifi i te tupu mai i mua noa ia Moemoea, i rotopu i te feia e noho ai i reira e te feia horue.
Mai te peu, e'ita teie fa'aturera'a i te fa'atura hia, te vai nei te tahi mau fa'autu'ara'a i muri mai.
Ua ha'amana hia teie fa'aotira'a e te pu a te tavana hau no Ni'a Mata'i nei, a mahana piti ra. E hope teie fa'aturera'a i te 31 no titema matahiti 2020.

Ua fa'aru'e mai te 'orometua ra Panai a Panai i roto i te va'u 'ahurura'a o tona matahiti.

E ta'ata tuiro'o teie i roto i te Fa'aro'o Porotetani. Orometua ato'a ho'i o tei ha'a na i Makatea e i Paea i te area matahiti 1960 ra. I te matahiti 1992 ra, ua fa'a feti'a hia e oia no te mau ohipa o tana i rave i roto i tona tavirira'a i te Atua. Ua huna-hia tona tino a mahana toru ra i Paea i te menema a Ofaitaoto.


le Jeudi 30 Juillet 2015 à 16:56 | Lu 708 fois